Notas de prensa

O Consello de Goberno da USC aprobou a primeira fase do Plan de Choque de PDI

O Consello de Goberno aprobou a primeira fase do Plan de Choque de PDI, coa asignación de 25 prazas, cumprindo así coa promesa electoral do equipo reitoral e que foi aprobado na programación plurianual de 2007. Este Plan servirá para que as áreas estruturalmente máis deficitarias poidan acometer os seus labores investigadores e docentes en mellores e máis estables condicións para o futuro.

A súa posta en marcha faise no preciso momento no que hai que acometer a creación dun novo modelo de Grao-Posgrao-Doutoramento, de xeito que contribuirá a garantir a necesaria mellora das áreas. Xunto con este plano porase en marcha outro estratéxico para programar o futuro das áreas, que se aplicará xa cos novos criterios de dedicación do profesorado que están a ser elaborados.

350 prazas de Medicina

Por outra banda, na mesma xuntanza a Universidade de Santiago estuda hoxe aumentar a 350 o número de prazas ofertadas para a Licenciatura en Medicina, de xeito que o límite desta titulación se incrementaría en 50 con respecto ao curso pasado.

De aprobarse a proposta no Consello de Goberno, no Campus de Santiago seguirían a ser sen límite as titulacións de Relacións Laborais, Economía, Administración e Dirección de Empresas, Dereito, as Filoloxías, Filosofía, Física, Química, Historia, Historia da Arte e Xeografía. Xa en Lugo, tampouco terán límite Relacións Laborais, Filoloxía Hispánica, Humanidades, Ciencias Empresariais; os segundos ciclos de Administración e Dirección de Empresas, Química, enxeñarías Agrónoma e de Montes e Ciencia e Tecnoloxía dos Alimentos; e as enxeñarías técnicas en Mecanización e Construcións Rurais, Industrias Agrarias e Alimentarias, Hortofruticultura e Xardinaría, Explotacións Agropecuarias e Forestais, así como a Enxeñaría Técnica en Química Industrial.

Manterían o mesmo número de prazas que este curso as titulacións de Óptica; todas as de Ciencias da Educación de Santiago e da Escola de Formación do Profesorado de Lugo; Xornalismo; Comunicación Audiovisual; Farmacia; Odontoloxía; as enxeñarías técnicas en Topografía e en Obras Públicas; Enfermaría tanto en Santiago como en Lugo; e o primeiro ciclo de Enxeñeiro Químico. E mentres que o límite de prazas aumentaría para a Enxeñaría Técnica en Informático de Sistemas, en Traballo Social e Bioloxía diminuiría.

Por outra banda, o vindeiro curso poñeranse en marcha os primeiros graos oficiais da USC adaptados ao Espazo Europeo de Educación Superior. No caso de Ciencia Política e da Administración ofertaríanse 100 prazas, mentres que Matemáticas arrancaría sen límite.

Calendario académico dos estudos oficiais

Na xuntanza trátase ademais o calendario académico do curso 2008-09 para os estudos oficiais de grao e master, que presenta algunhas diferenzas con respecto ás demais titulacións, de xeito que o período lectivo comprenderá do 22 de setembro de 2008 ao 31 de xullo de 2009. O primeiro cuadrimestre estenderase ata o 7 de febreiro, mentres que o segundo será entre o 9 de febreiro e o 20 de xuño de 2009.

Ademais, en cada curso académico os estudantes terán dereito a dúas oportunidades para seren avaliados. A primeira terá lugar a final de cada cuadrimestre –do 22 de xaneiro ao 7 de febreiro e do 4 ao 20 de xuño- e a segunda en xullo, do día 6 ao 21.

Novas titulacións

Na xuntanza debátense ademais as liñas xerais da USC para a elaboración das novas titulacións oficiais como o grao, o máster universitario oficial e os programas conducentes ao título de doutor. Outro punto a estudo é o procedemento que rexerá o proceso de presentación das propostas de titulacións de grao e elaboración das correspondentes memorias de planos de estudo, ademais dun documento sobre normas de xestión das ensinanzas de grao na USC.

Outros asuntos

Outros asuntos da orde do día son a modificación da convocatoria da Escola Infantil Breogán para o vindeiro curso, entre elas a actualización dos seus prezos; prazas de profesorado; profesores eméritos; anos sabáticos; cursos de posgrao propio e a designación de tres membros do Consello na Comisión de Mecenado e Colaboración.