Notas de prensa

Chapela imponse con brillantez na XXIV Bandeira Concello do Grove

Chapela recibiu un merecido premio ao seu esforzo e conseguiu imporse na sexta proba da Liga Galega de Traiñeiras. A XXIV Bandeira Concello do Grove trouxo consigo a primeira vitoria do equipo de Chapela, o terceiro conxunto que consigue gañar unha bandeira na presente tempada. Náutico de Vigo pagou un erro ao tomar a segunda virada e quedou segundo. Samertolameu, pola súa banda, só puido rematar terceiro. Cuarto foi Rianxo e quinto un dos anfitrións, Mecos.

Ás 11.30 horas deu comezo a competición. C.R. Vilaxoán, C. R. San Felipe, Amegrove C. R., C.R. Coruxo, e C. M. Bueu formaron unha primeira quenda de cinco embarcacións, por ausencia de C.R. Vila de Cangas. Na primeira virada, Amegrove entrou en cabeza, seguido de preto por Coruxo e Bueu. Porén, na segunda, un erro dos grovenses ao tomar mal a baliza, permitiu a Coruxo tomar vantaxe e manter a clasificación na terceira. Finalmente, os coruñeses conseguiron levarse a quenda cun tempo de 22:00,41, seguidos de Bueu, Vilaxoán, Amegrove e San Felipe.

C. R. A Cabana, C. R. Ares, C. R. Puebla, A. D. Esteirana e C. Regatas Perillo foron os seguintes en competir. Esteirana colocouse primeiro na primeira virada, e tras el pasaron Perillo, Puebla, A Cabana e Ares. Cambiaron as tornas por completo coa chegada da segunda virada, na que Ares pasou de pechar a quenda a liderala nunha expectacular remontada. Perillo conseguiu superalo na terceira, pero Ares non estaba disposto a deixar a cabeza: volveron remontar e leváronse a quenda; tras el chegou Perillo e dez segundos despois Puebla. Esteirana e A Cabana quedaron cuarto e quinto respectivamente.

A última quenda do día quedaba reservada para os mellores da Liga. C. R. Rianxo, S. D. Samertolameu, R. C. Náutico de Vigo, C. R. Chapela e C. R. Mecos mostraron a súa calidade nunha regata moi competida. Náutico pasou a primeira baliza en primeira posición e Chapela, Samertolameu e Rianxo entraban xuntos, cunha diferencia dun só segundo. Porén, Chapela soubo aproveitar o erro de Náutico de Vigo, que entrou mal na segunda virada e púxose en cabeza, seguido dos vigueses e dos anfitrións de Mecos. As cousas mantivéronse na terceira e foi no último longo cando Samertolameu fixo un último esforzo para tentar alcanzar aos primeiros. Finalmente, Chapela conseguiu imporse. Náutico de Vigo foi segundo e Samertolameu rematou terceiro. Rianxo rematou cuarto e Mecos cedeu postos para ser finalmente quinto.

Deste xeito, Chapela, cun tempo de 20:58:91, adxudicouse a proba do Concello do Grove.

Incidencias: C.R. Vila de Cangas non participou na XXIV Bandeira Concello do Grove por ausencia por enfermidade de varios dos palexeiros.

DECLARACIÓNS
José Romero ‘Biski’, patrón de C.R. Rianxo: “Quedamos un pouco decepcionados polo resultado da proba; o vento dificultounos a regata. Intentaremos mellorar e recuperar a terceira posición para manternos entre os primeiros”; “Temos un equipo cheo de remeiros xoves, e por iso está custándonos un pouco acoplarnos; agora o noso principal obxectivo e acadar a estabilidade”.

Arturo Abruñedo, adestrador do R.C. Náutico de Vigo: “Non nos foi mal, pero non saiu todo o ben que esperabamos; fixemos un primeiro longo bo, pero o erro na segunda virada custounos caro e non puidemos alcanzar a Chapela”; “Na vindeira regata intentaremos manter o noso posto fronte a Chapela, sen perder de vista a Rianxo e Mecos que veñen apertando nas últimas citas. As diferencias son mínimas”.

David Arosa, patrón de S.D. Samertolameu: “Fixemos unha mala regata; deixamos aire a Chapela e Náutico e o erro custounos bastante caro, aínda foi ben que quedar segundos”; “Temos que crear tensión en regata, hoxe vimos un pouco durmidos e para a vindeira cita imos chegar con ganas de resarcirnos”.

Isidro Freire, patrón de Chapela: “Saímos moi motivados; soubemos manexar a regata, xa que tiñamos o vento en contra na regunda virada e se nos fixo moi duro. Fomos crecendo pouco a pouco e así conseguimos a Bandeira”; “Para a vindeira cita aspiramos principalmente a seguir disfrutando do remo e a intentar subir postos”.

Na clasificación xeral, Samertolameu lidera a Liga, seguido do Náutico de Vigo a cinco puntos e Chapela a oito.